Anang Mantul Taja Enda Pass SPM

Anang mantul taja enda pas SPM Ulih Jacqueline David
Sida ke enda ulih nyambung pelajar diasuh ngambi kus teknikal ba IKMKUCHING: Sida ari menua pesisir ke udah abis peresa Sijil Pelajaran Malaysia (SPM), tang enda ulih nyambung pelajar diasuh ngambi kus teknikal sereta pengelandik ba Institut Kemahiran Mara (IKM).Ku Sapit Menteri Pemansang Menua Pesisir enggau Menua Tengah, Datuk Joseph Entulu Belaun madah, ba dunya kemaya hari tu ke balat bendar mansang enggau teknologi sereta pasar tebuka, siku-siku orang ke deka gawa patut nyendiaka sida iya enggau mayuh macham penemu sereta pengelandik awakka ulih besemekih ukai semina ba renggat nasional tang mega ba renggat global enda ngira enti gawa ke diri tauka makai gaji.
“Nembiak ke udah ngambi peresa SPM ari menua ulu patut ngemeranika diri betunga enggau chabar globalisasi laban menua diatu begunaka mudal mensia ke bisi pengelandik ke ulih kena ngemenuhka peminta ba mayuh macham sektor di menua tu.
“Raban nembiak tu ukai semina bepanggai ba pengawa betanam betupi ke dikereja diri empu aja, tang nguji nyendiaka diri enggau pengawa latih enti deka nyadi Bumiputera ke ulih besemekih.“Aku ngarapka apai indai ke bisi ditu ke udah nganjung bala anak kita nyambung pelajar anak kita ba IKM deka madah ngagai kaban belayan tauka bala pangan kita (ke udah abis peresa tang enda mujur ba SPM) kelebih agi sida di kampung tauka rumah panjai menua pesisir masuk institusi latih baka IKM, Pusat Giat Mara tauka ba palan pengelandik bukai,”ku iya.
Tu ku iya laban jemah ila, chara kitai ngiga pemisi ukai semina bepanggai nyadi orang berikan tauka bekebun mit, nyadi orang ke pakar sereta landik ba pengawa teknikal.
Kelimpah ari nya, Entulu madah lebuh betunga enggau pendiau kemaya hari nitihka ubah jampat begulai enggau pengerembai teknologi ke majak mansang sereta pasar tebuka, sida ke udah ngabiska pelajar patut mega enda ninggalka pengelandik ‘interpersonal’ baka berkomunikasi, nyadi ketuai ke manah sereta landik ngena jaku Inglis.
“Orang ke deka ngambi kita gawa beguna agi nembiak ke bisi ‘multiskilled’ lalu ukai semina landik ba siti bidang aja,” ku iya.
Entulu mega ngasuh IKM terus ngangkatka pemanah pelajar ba institut nya awakka iya ulih nempa rebak dudi ke bekualiti lalu ulih ngemenuhka peminta menua tu.
Ku iya, kurikulum ke bekualiti ukai semina ulih nyamin pemujur ba akademik enggau pengelandik, tang iya ulih ngubah ulah nembiak ngasuh sida nyadi orang menyana sereta bisi kualiti ari tiap renggat pendiau sida.
Sebedau nya, Pengarah IKM Kuching, Mahazani Ali madah program pengawa latih renggat setipikit ke bisi ba IKM dikena ngelatih bala nembiak Bumiputera ba mayuh macham pengawa teknikal enggau pengelandik awakka sida iya ulih gawa ba sektor pengawa dagang, industri kelimpah ari ngajar sereta nyendiaka sida nyadi orang dagang.
Iya madah, nitihka peneleba IKM ke nyadi sekeda institut ke ngelatih nembiak di Malaysia, graduan IKM Kuching ulih besemekih ba makit luar.
“Bisi pemandai, penemu sereta pengelandik ke ulih kita ba IKM, bala graduan bisi peluang ngemansangka Sarawak kelebih agi nyadi penyukung orang gawa ba Koridor Kuasa Tau Kena Baru Sarawak (SCORE),” ku iya.
Ba pengawa konvokesyen nya, bisi 306 iku nembiak pas ba pelajar sida.