Tokoh 1Malaysia basa besai ngagai Tra enggau bansa Iban
KUCHING: Basa nyadi siku ari 10 Tokoh 1Malaysia ke diberi ngagai Dato Sri Tra Zehnder @ Philomena Tra Anak Jemat malam Hari Malaysia 10 Oktober tu tadi nya mega basa ngagai raban bansa Iban di menua tu.
Semina dua iku indu sekayu Malaysia nerima gelar malam nya. Indu siku agi enggau Tra nerima gelar, Zaiton Othman ari ke megai pengawa nyadi pengarah Kunsil Lumba Nasional (National Sports Council).
Bala lapan iku sida ke bukai nya lelaki magang nyengkaum dua iku pungka lelaki ari Sarawak, iya nya bekau Sekiteri Menua Tan Sri Bujang Mohd Nor enggau kaban politik veteran Dato Sri Dominic Dagok.
Tra endang sigi patut nerima gelar tu, laban iya meh pemungkal Sarakup Indu Dayak Sarawak (SIDS) ke diatu betuaika Senator Dato Sri Empiang Jabu, kelimpah indu keterubah nyadi kaban kunsil nengeri Sarawak kenyau ari menua tu apin merdeka kelia.
Dalam taun 1960, iya nya tiga taun sebedau Malaysia ditumbuh, Tra endang udah duduk berimbai enggau niang Datuk Bandar Abang Mustapha kelia ba aum kunsil nengeri, nitihka gaya gambar ke bisi diberi iya ngagai media dulu ari tu.
Ari nya kitai nemu, nadai indu Iban tauka lelaki Iban ke agi idup, patut nerima gelar nya lebih ari Tra ke sebadau tu nyadi Temenggong ungkup bala Iban di menua Kuching.
Pekara pasal Tra nerima gelar tu bisi nostalgia mimit ba penulis empu laban ke ampit diajar siku ari anak iya kelia. Dalam taun 1969, penulis ke maya nya dalam Pom Dua diajar Cynthia Zehnder sabjek jaku Inglis ba sekula sekonderi Saratok.
Cynthia ke diatu dipelaba penulis udah pinchin nyadi pengajar, jadi enggau siku kaban penulis, iya nya Michael Anchang, ke dalam taun 1969 sama ngajar enggau Cynthia ba SMK Saratok.
Nyadi maya Tra ke diberi gelar tu, iya nya malam 10 Oktober tu tadi ba pengerami di Padang Merdeka, Malam Hari Malaysia ditu ke keterubah iya kala diatur di Sarawak endang penuh reti sereta tetap dalam pengingat belama ungkup beribu-ribu bala rayat bandar raya Kuching. Endang amat ngena bendar ga pengerami nya diatur ba Padang Merdeka ditu.
Perdana Menteri Malaysia Datuk Seri Najib Tun Abdul Razak lebuh bejaku ba pengerami nya madah, pengerami nya nanda penyerakup nyadi siti menua Malaysia lebuh Sabah, Sarawak enggau Semenanjung Malaysia diserakup nyadi siti menua 46 taun ke udah.
“Hari Malaysia besai bendar reti laban nya nya meh maya Sabah enggau Sarawak setuju ngulihka merdeka ngena penumbuh Malaysia.
“Maya nya nitih penemu bala ketuai ari dua bengkah Menua, iya nya Sabah enggau Sarawak, enti sida masuk nyadi sebagi ari menua Malaysia, sida deka mujur agi dalam penatai pemisi sereta mega bulih pengelikun,” ku iya madah.
Sebedau tu, Najib disempulang ulih Kepala Menteri Pehin Sri Abdul Taib Mahmud nuntung datai ba padang nya urung jam pukul 8.20 malam, lalu udah nya ditangkan ulih Gabenor Sarawak TYT Tun Datuk Patinggi Abang Muhammad Salahuddin seduai bini iya Toh Puan Datuk Patinggi Norkiah.
Bala pemesai bukai ke sama bisi datai ba pengerami nya nyengkaum bala dua iku Sapit Kepala Menteri, Menteri Kabinet Perintah Besai, Menteri Perintah Menua, bala pengari rayat sereta enggau ketuai raban bansa.
Pengerami nya bisi ditabur terus (live) ulih RTM ba TV1 jam pukul 8.30 malam.
Kena mungkal program pengerami, bala 80 iku raban tanda enggau main asal mantai tanda sida ba panggau sebedau meri basa ngagai lagu bansa ‘Negaraku’ ditangkan lagu Menua ‘Ibu Pertiwiku’.
Udah nya pengerami nya disambung enggau bantai tanda ari bala raban ke sama, ke alai sida ngena ngepan penuh chura enggau gaya, ke mega bisi ala moden enggau tradisional ngayanka gempung enggau penyerakup semua rayat ari mayuh pupu raban bansa, etnik lalu nyerita pasal penumbuh Malaysia ke dikumbai ‘Selamat Datang 1Malaysia - 1Semangat, 1Tekad, 1Aspirasi.’
Pengerami nya besambung enggau jaku ari Menteri Pemadah, Komunikasi enggau Main Asal Datuk Seri Utama Dr Rais Yatim.
Dalam jaku iya, Rais madah tuju ngatur Hari Malaysia nya endang kena ngingatka semua rayat Malaysia pasal pemerani pungka lelaki iya ke begadai nyawa ngelaban munsuh ngetanka menua, lalu ka tambah bakani pengeran bala ketuai dulu suba ke ngulihka merdeka, ngangatka pemereti ati sereta negika pengelikun sereta penyerakup rayat mayuh. Lagu ‘Malaysia Berjaya’ ke dimain bala raban nembiak Saberkas nangkan entudi nya.
Kepala Menteri ke bejaku nangkanka nya, madah menua Sarawak sigi temegah sereta gaga bendar ati masuk Malaysia laban menua Malaysia udah nyapai tikas ke dipebasa ulih mensia mayuh di serata dunya.
Lagu ‘Malaysia Satu’ ari Faizal Tahir lalu nangkanka nya. Lagu tu ke menang ba pekit lagu 1Malaysia dalam bulan September, digaga Audi Mok sereta lirik iya ditempa Nur Fatima.
Udah nya baru idar bala sida Tra enggau sembilan bala Tokoh 1Malaysia ke bukai nerima prais sida ari Najib.
Bala sida tu endang orang ke bisi budi besai ngagai menua diberi basa besai nerima pemeri kena ngenang budi sida dalam penyerakup raban bansa di Malaysia.
Kelimpah ari tiga iku rayat Sarawak ke udah disebut tadi nerima prais nya, bala sida ke nerima nya (ari Semenanjung) nyengkaum kaban sejarah Prof Emeritus Tan Sri Dr Khoo Kay Kim, pengarah besai Dewan Bahasa dan Pustaka Datuk Dr Hassan Ahmad, Sapit Dekan di Universiti Sains Malaysia Dr Sivamurugan Padian enggau pengarah Kunsil Lumba Nasional (National Sports Council) Zaiton Othman.
Ari Sabah, sida ke nerima prais nya dua iku kaban politik veteran Tan Sri Datuk Apung Puyun seduai Datuk Abdul Malik Jangkat sereta enggau bekau menteri kabinet Sabah Datuk Pang Tet Tshung.
Tuchung pengerami nya lalu entudi nangkanka tu ke alai Najib, Taib enggau Sapit Kepala Menteri Sabah Datuk Yahya Hussin nantaika menira Malaysia siti siku ba panggau lalu disempulang ulih bala pemesai bukai ba panggau baka Rais seduai TYT.
Udah nya Najib lalu ngulu mensia mayuh nyerauh nyebut ‘Merdeka’ ke mega ditunda ulih beribu-ribu rayat mayuh bisi tujuh kali ditangkan enggau sebut ‘1Malaysia’ tiga kali kena nanda Hari Merdeka.
Pengerami ba Padang Merdeka terus bejalai enggau kunsit ulih mayuh bengkah raban tanda sereta penyanyi ari Sabah, Sarawak enggau Semenanjung.
Bala ari Sarawak ke sama bisi belagu nyengkaum sida ke udah bisi pegari nama nyengkaum Dayang Nurfaezah, Bob enggau Claudia Geres ari Akademi Fantasia 7, ka tambah mega ari Sabah baka Lotter seduai Hans, Karen Wong, Roy enggau Hanh.
Nya alai jarang ke enda tembu bendar ati berami ba Padang Merdeka malam hari Enam nya suba. Endang amat ngena iya Hari Malaysia, laban kunsit mega 1Malaysia.
Kitai ngarapka semengat enggau pengagit 1Malaysia ke sempun iya endang semampai mau ngerandang di Sarawak tu terus idup enda padam.
Lalu pia mega, kitai ngarapka ibu Tra Zehnder terus dalam pengerai enggau pengelantang