Pekit Kumang Dayak Sarawak Disakal

Pekit Kumang Dayak Sarawak disakal
Bala raban SIDS madah atur nya ngemaruhka indu Dayak ke nyadi sabjek iya
KUCHING: Sarakup Indu Dayak Sarawak (SIDS) nyakal atur pekit Kumang Dayak Sarawak tauka dalam jaku ribai ‘Miss Dayak Sarawak beauty pageant’ laban madah nya baka reti ngemaruhka indu Dayak.Chermin SIDS Senator Dato Sri Empiang Jabu, kemari iranka kebuah pengatur pekit , Alaric Soh, ke milih bala Dayak nyadi sabjek pekit nya.
“Kami nadai nyakal penemu tauka atur pekit pemajik gamal. Kami nemu sereta muji pengelandik Alaric Soh, pengatur pekit ‘Miss Dayak Sarawak’ ke endang tebilang landik ngatur pekara bepekit ngelamatu.
“Tang taja pia, kami iranka kebuah iya milih seraban pupu bansa, iya nya bala Dayak nyadi sabjek siti pekit pemajik gamal ari iya,” ku Empiang lebuh bejaku ngagai The Borneo Post/ Utusan Borneo kemari.
Empiang madah nadai kala atur pekit pemajik gamal tauka ‘beauty pageants’ enda ngira iya ba enggat menua tu empu tauka ba renggat entara bansa, ngena nama siti raban bansa, etnik tauka pupu bansa.
“Enti nama siti pupu raban bansa nya nyadi siti singkang inovatif dalam industri pekit pemajik gamal, ngena sereta bebasa agi enti orang bekuasa baka gerempung, raban tauka renggat opis menteri ditanya dulu tauka alai minta kemendar ari sida raban bansa. Nyadi dalam senentang pekara tu, naka ke ditemu kami, bala kami, tauka sebarang sapa kuasa tauka opis enggau raban ke patut nadai kala alai betanya, tauka bepinta kemendar,” ku Empiang.
Iya keran madah SIDS endang semampai siru sereta betati pasal atur breakup ngasuh tegut kaul entara raban bansa. Nya alai sida ending keran ngajar bala kaban sida ngambika semampai bebasak adat enggau main asal raban bansa bukai di Menua tu.
“Dalam pekara besangkut paut enggau perambu ngatur pekit ‘Miss Dayak Sarawak’, pengatur engka ‘enda ingatka’ pasal pekara basa ngagai raban bansa Dayak,” ku Empiang agi.
“SIDS minta pengatur bejimat sereta mereti pasal bekau pangki beduduk ari pekara tu enda diperati sereta dibantai ari semua sukut segi laban nangika bala raban bansa Dayak endang lantang ati disengki pekit tu ke berupai bisi tuju eksploitasi komersial lalu publisiti negatif beduduk ari tempa nama enggau atur pekit tu,” ku iya ngujungka jaku.
Senator nya ngenang pasal ripot dalam surat berita di The Borneo Post kena 9 Oktober ngerah pasal perambu deka ngatur pekit ‘Miss Dayak Sarawak’ tauka Kumang Dayak Sarawak.
Pekit nya deka diatur Alaric Soh ke sigi udah pegari nama dalam dunya ngatur pekit pemajik gamal. Sekeda pekit ke udah kala diatur iya nyengkaum Miss Cheongsam, Miss Sarawak enggau Miss Tourism.
Soh madah ba siti aum berita kena 8 Okt pasal atur pekit ‘Miss Dayak Sarawak’ nya ukai mina kena milih indu Dayak pemadu bajik tang mega nyadi penyurai kena bala sida nya bekenjing lalu mujur dalam karier sida jemah ila.
Ditaga deka diatur sebedau Krismas, pekit tu deka meda sida ke enggau pekit bisi catwalk ngena baju gaun lemai lalu ukai ngena ngepan asal bansa.
Besangkut enggau tu, Sekiteri Honorari SIDS
Senorita Linang ke suah menang dalam pekit pemajik gamal maya agi dara kelia, madah: “Enda mereti aku nama kebuah enggai enda milih indu Dayak kena bepekit nya. Ukai kami nagang iya (Soh) ngatur pekit pemajik gamal, tang kami mina berundingka bala tudah sida indu Dayak (ke nyadi sabjek pekit).”
Senorita ke mega siku ikon dalam industri musik Iban, madah pekit pemajik gamal ke diterima sereta dipesetuju tiga komuniti besai raban bansa Dayak — Iban, Bidayuh enggau Orang Ulu nya pekit Kumang Gawai.
“Pekit Miss Dayak Sarawak nya mina ngemaruhka bala indu Dayak laban nya ngayanka sebarang orang ulih madah tauka ngayan ngagaui kami bakani kami ulih promosi main asal bansa kami empu, lalu nadai beduli tauka bebasa tauka ngira sekalika iya sensitive tauka enda ngagai bansa enggau adat asal kami,” ku Senorita.