Miss Dayak Mesti Diatur Dayak,pia ku Mawan

Miss Dayak mesti diatur Dayak, pia ku Mawan
KUCHING: Sapa ke deka ngatur pekit ‘Miss Dayak Sarawak’, patut ari bansa Dayak empu, pia ku Menteri Pemansang Sosial enggau Kandang Nengeri Dato Sri William Mawan madah, laban ku iya nya ukai sebarang enti deka ngatur pekit baka tu laban iya besangkut paut enggau siti-siti bansa enggau adat sereta penemu lama.
“Aku nyukung bantah Sarakup Indu Dayak Sarawak (SIDS) pasal ngatur pekit ‘Miss Dayak Sarawak’ nya. Enti pasal pekit kumang bukai, nyangka ulih tang enti sida iya deka ngena jaku ‘Dayak’, pekara nya patut diperatika lalu iya patut dibantai dulu ngagai komuniti Dayak, awakka reti jaku etnik ke dikena nya dipansik dulu enti iya betul tauka enda,” ku iya madah ngagai surat berita The Borneo Post maya ditalipaun kemari.
Ku iya, tukang ngatur pekit patut nemu lebuh deka ngatur pekit ngena nama jaku siti-siti bansa, laban pengawa nya bisi sangkut adat sereta ajat.
Ku iya baru, nadai orang bukai ke bepenemu manah agi pasal adat Dayak enti ukai ari orang Dayak empu.
Kelimpah ari nya, ku Mawan pengawa pekit baka nya patut dibantai maya hari besai Gawai Dayak, lalu gerempung tauka opis agensi perintah ke ngatur pekit kumang Gawai Dayak sigi udah bisi mutarka pengawa nya.
“Tu nyangka datai ari tukang ngatur pengawa (Alaric Soh) mantaika pekit kumang tu tang taja pia, iya patut minta pemendar ari komuniti sebedau mutarka pengawa tu. Iya enda sebaka enti iya ‘disub-kontrak’ tang ba pengawa baka tu, Alaric empu ngatur pekit tu.
“Enti kitai ngambika chunto, tu pan tau di sema baka orang Dayak ke deka ngatur pekit kumang India. Orang nya pan deka begunaka penemu pasal adat bansa nya lalu utai ke berat, iya nya enda tau enda minta pemendar ari komuniti nya dulu,” ku iya.
Iya madahka ‘Miss Dayak Sarawak’ patut bisi reti ke bendar maya ngatur pekit tu lalu iya patut diputarka orang Dayak empu. Laban enti ukai Dayak ke ngatur pekit tu, enggai ke bisi penemu salah ke enda ngipakka bansa Dayak empu. Lalu nambah enggau nya, enggai ke iya nyadi pengawa komersil tauka orang bukai ngambi ulih ari pekit tu.
Sigi amat bansa Dayak nyukung konsept 1Malaysia tang taja pia, iya madah pekit kumang baka tu patut dipansik dulu ari tiap sukut lalu iya patut diatur manah sereta nitihka atur tauka konsep.
“Enti sida iya deka ngena jaku Dayak, pekit nya enda tau enda ngayanka adat asal ke sigi ngayanka komuniti Dayak. Nya alai pekit baka tu awakka orang Dayak empu mutarka pekit nya,” ku iya baru.
Kontroversi ke nyadi pasal pekit kumang ‘Miss Dayak Sarawak’ berindik ari SIDS ke mantah pasal pekit nya lalu madah pekit nya ngemaruhka raban indu Dayak.
Chermin SIDS Senator Dato Sri Empiang Jabu, 12 Oktober tu tadi nanya Alaric Soh kebuah iya ngatur pekit kumang Sarawak’ ke bisi ngena jaku ‘Dayak’ ba pekit nya.
Ku Empiang, naka kediatu nadai pekit kumang menua tu tauka ba renggat entarabansa kala dikangau enggau nama siti-siti bansa.
“Enti deka ngena nama siti-siti bansa laban deka ngaga pekit nya inovatif agi ba industri pekit kumang baka nya, manah orang ke tukang ngatur pekit baka nya, nanya dulu ngagai opis bekuasa, gerempung tauka ba renggat opis menteri minta pemendar deka ngena nama siti-siti bansa. Ba penemu kami, tu bedau diputarka sida,” ku Empiang.
SIDS madah ngagai Soh, ngasuh iya beratika pekara baka tu laban pangka iya tau raya enti pekit kumang tu enda dikemutar enggau manah.
Kelimpah ari nya enggaika mayuh agi bantah diterima ila ari komuniti Dayak ke ngumbai pekit nya deka nyadi pekit komersil lalu nerima publisiti ke enda manah.
“Kami nadai nyakal penemu tauka atur pekit pemajik gamal. Kami nemu sereta muji pengelandik Alaric Soh, pengatur pekit ‘Miss Dayak Sarawak’ ke endang tebilang landik ngatur pekara bepekit ngelamatu.
“Tang taja pia, kami iranka kebuah iya milih seraban pupu bansa, iya nya bala Dayak nyadi sabjek siti pekit pemajik gamal ari iya,” ku Empiang lebuh bejaku ngagai The Borneo Post/Utusan Borneo kemari.
Empiang madah nadai kala atur pekit pemajik gamal tauka ‘beauty pageants’ enda ngira iya ba enggat menua tu empu tauka ba renggat entara bansa, ngena nama siti raban bansa, etnik tauka pupu bansa.
“Enti nama siti pupu raban bansa nya nyadi siti langkah inovatif dalam industri pekit pemajik gamal, ngena sereta bebasa agi enti orang bekuasa baka gerempung, raban tauka renggat opis menteri ditanya dulu tauka alai minta kemendar ari sida raban bansa.
Nyadi dalam senentang pekara tu, naka ke ditemu kami, bala kami, tauka sebarang sapa kuasa tauka opis enggau raban ke patut nadai kala alai betanya, tauka bepinta kemendar,” ku Empiang.
Soh, orang ke tebilang ngatur mayuh macham pekit renggat dunya, bisi madah diri deka meri kelala pekit kumang ‘Miss Dayak Sarawak’ ke madahka pekit tu ila enda sebaka enggau pekit Kumang Dayak ke selalu diatur maya Gawai Dayak.
Pekit ‘Miss Dayak Sarawak’ tu enti nitihka pelin, iya deka dipejadi sebedau Hari Krismas, lalu sekeda ari atur pekit tu deka mandangka raban indu Dayak tu ngayanka gaun lemai ba ‘catwalk’ lalu ukai ngena gari ngepan.
Soh di pelaba deka ngatur aum media pasal pekara tu saritu (14 Oktober).