Berunding Panjai Sebedau Pindah Ke Nengeri

Berunding panjai sebedau pindah ke nengeri
Ari ke ngintu anak sekula sebelah nengeri, bala apai indai bisi asil agi nguan rumah panjai
KAPIT: Bala apai indai nembiak ari rumah panjai dipinta berunding panjai sebedau sida bepindah pendiau ke nengeri laban keran deka nyempulang anak sida sekula di nengeri.
Menteri Pemansang Tanah Sarawak, Dato Sri Dr James Masing madah, amat meh perintah balat ngemeranka pelajar sekula bala nembiak ditu, tang ukai reti bepindah pendiau ke nengeri nya siti chara ke pintar, enti anak sida apin manggai ba tikas pelajar tinggi, iya nya naka mina belajar ba sekula primari.
“Perintah endang amat meransang bala rayat pesisir nganjung tauka nyengula anak sida laban deka ngulihka mayuh penemu ke beguna. Nya alai nya meh kebuah perintah ngaga mayuh sekula di menua pesisir awakka mudah agi bala apai indai menua ulu nyengulaka anak sida ba sekula di pesisir, lalu enda tinggal singkang dalam pemansang kelebih agi pelajar sekula,” pia ku Masing lebuh bejaku ba Pengerami Ketuai Segulai Sejalai enggau Rayat ba Rumah Demong, Ulu Mujong di menua Baleh hari Satu tu tadi.
Menteri nya madah, taja pan pelajar sekula sigi patut berat dikemeranka bala anak sida, ukai reti bala sida apai enggau indai enda ulih enda ngeribat diri bepindah pendiau ke nengeri nyempulang anak sida ke sekula di nengeri lalu ninggal reta tengkira, buah, tanah, umai, kebun enggau bilik penaik ba rumah panjai ditejuka puang, nadai orang ngintu.
Ku iya, apai indai manah agi terus ngemeranka pendiau enggau pengidup sida ba rumah panjai lalu nejuka bala anak sida sekula di nengeri (ungkup sida ke sekula sekonderi) laban tebal agi sekula nya endang sekula bemalam , iya nya sekula bisi endur buding ungkup bala nembiak ari menua pesisir.
Bala apai indai ku Masing, deka lebih produktif di rumah panjai, ngintu, ngemata sereta ngereja kebun sida lalu bulih belanja ungkup kena sida iya empu sereta mega kena melanja sekula bala anak sida.
Sida deka untung sereta produktif agi ngereja umai, ngereja kebun sida, ngereja umai sida. Lalu enti sida diau di nengeri kekadang lama bendar sida nadai gawa tauka terus nadai bulih pengawa ke meruan. Tu deka terus ngeribat sida.
“Aku suah bendar udah nerima pemadah pasal mayuh kes penanggul sosial ke nyadi di nengeri tauka di bandar raya beduduk ari bala kitai ari rumah panjai ke baru diau di nengeri lalu meda mayuh pengawa enggau ulah nengeri ke jauh nyelaie ari kitai di menua ulu, iya nya sekeda pekara ke ngasuh sida balat tekenyit, jalai pengidup ke ngasuh sida beba runding enggau ulah.
Kebuah tu nyadi laban sida enda mudah sereta tusah deka neleba diri enggau pengidup di nengeri lalu tu ngenataika penanggul ngagai sida, ku Masing.
Ku menteri nya nambah, nadai kebuah bala apai indai enggau rayat di menua ulu enda tau enda nganjung anak sida sekula ba renggat baruh (sekula primari) ngagai sekula di nengeri, laban perintah diatu endang udah mayuh nyendiaka fasiliti pelasar ke chukup (ba sekula primari) di menua ulu, nyengkaum bekal karan 24 jam.
Ngenang pasal pemansang jalai alun, Masing madah, lebih mayuh jalai alun deka digaga dalam Langgur Malaysia Lumpar 10 (RMK-10).
Nya alai, ila ngansak semua rayat, kelebih agi ba sitak bepilih Baleh, minta sida anang enda berakup enggau perintah kena nentuka pejalai semua projek pemansang dia nadai tejanggal.
“Aku minta semua rayat di menua Baleh ngambika keran besabar lalu nyukung ketuai perintah Barisan Nasional (BN),” ku iya.
Iya udah nya lalu nyua chek bantu tasah ampuh bah sitak Kapit penyampau RM174,000 ngagai bala tudah sida ke balat tasah laban ampuh bah ba ba menua Sungai Tunoh pun bulan Mac taun tu tadi sereta mega nyerah gran perintah penyampau RM44,000 ngagai sekeda Komiti Pengelikun enggau Pemansang Pendiau (JKKK) enggau raban ukai perintah (NGO).
Sekumbang ke nemuai tiga hari ke Sungai Mujong, Masing bisi ngetu ba Rumah Lugat, Sungai Majau; Rumah Kanyan, Nanga Sepasir (meresa tanah alai ngentak rumah panjai baru) enggau Rumah Bangkong di Ulu Mujong.
Dalam penemuai nya, Masing disempulang ulih ketuai raban bansa dia Pengulu Stewart Sawing, sekiteri pribit iya Wilson Ugak Kumbong, sekeda bala orang kanan opis perintah, bala ketuai rayat sereta enggau bala penyukung Parti Rayat Sarawak (PRS).