Belabuh Nyimpan Duit Nyengula Anak Ari Pun

Belabuh nyimpan duit nyengula anak ari pun
Apai indai bisi duit simpan senang melanja anak ngagai IPT
ENGKILILI: Bala apai indai dipinta nyendia diri nyimpan duit ari pun enti sida deka bala anak sida mujur nampung pelajar ngagai tikas ti tinggi agi. Sida enda tau enda neleba diri enggau ulah nyimpan duit menggal mit berengkah ari diatu.
Jaku nya datai ari Kaban Kunsil Nengeri (KN) Engkilili, Dr Johnnical Rayong Ngipa ke madah ulah nya manah ka pengidup apai indai sereta anak sida dudi hari ila.
Ulah apai indai ke nyimpan duit kenyau ari anak sida agi mit ngagai maya sida udah datai ba maya nampung pelajar ngagai sekula tinggi (IPT) bala kolej enggau universiti nya baka nyendika empayung sebedau hari ujan, ku Rayong.
Enti apai indai bisi belanja sida iya empu kena nyengula anak, sida deka diau lebih senang enggau lantang dudi hari ila, ku iya.
Ku iya, gaya perati enggau peda iya, bala nembiak Iban mayuh bendar pandai dalam akademik ba renggat sekula sekonderi, tang sida nadai ulih nampung pelajar sida ngagai IPT laban apai indai sida suntuk belanja.
“Mayuh apai indai madah sida enda ulih nganjung anak sida belajar tinggi agi laban sida nadai belanja kena nanggung ungkus pelajar anak sida ngagai renggat IPT.
“Nya alai tegal nya, apai indai kira enda mujur bejalaika tanggung pengawa nyadi apai indai, enti pekara nya nyadi.
“Kita apai indai enda patut nejuka pekara nya nyadi bakanya.
“Kita mesti berengkah nyimpan duit ari pun, ari diatu,” ku Dr Rayong lebuh bejaku ba pengerami nutup ‘Program Mesra Rakyat’ ba Rumah Elui, Marup Atas ari atuR Opis Kemas P.203 Lubok Antu, kemari.
Pengerami nya dulu ari nya dipejadi Kaban Parlimen Lubok Antu, William Nyalau Badak.
Dalam pengerami nya Dr Rayong bisi nyua chek ungkup RM18,000 ngagai pengari Opis Kunsil Pelilih Lubok Antu ke nerima chek nya ungkup dipedua dua iti komiti pemansang enggau pengelikun pendiau (JKKK) ba menua Skrang, dua iti gerempung apai indai enggau pengajar (PIBG) sereta siti kelab enggau siti gerempung.
Kelimpah nya ku iya, taja pan mayuh alai ngelun sereta mega mayuh biasiswa ari perintah, apai indai enda patut ngarapka bulih nya tauka enti sema bulih, sida enda patut ngarapka nya aja, laban lun enggau biasiswa nya ka tambah duit simpan kitai apai indai empu, ku Dr Rayong.
Ungkus nampung pelajar ngagai IPT sigi besai, nya alai apai indai enda ulih ngarap tauka bepanggai ba lun enggau biasiswa aja, ku iya sereta madah sida mesti bisi belanja diri empu.
Enti kita mina ngarapka belanja ari lun enggau biasiswa ngena nanggung pelajar anak kita ngagai IPT, dudi ila kita deka bepenanggul besai.
Nya alai anang enda mula nyimpan duit ari diatu, ku iya.
Sama bisi datai ba pengerami nya ketuai pemadah Parlimen P. 203 Lubok Antu, Geoffery Baja Ricky Maba, pemesai Jasa Engkilili Edwin Ancheh, Pengemata Kemas Lubok Antu, Kumpang Datuk Tutong sereta bala ketuai raban bansa ba menua kelingi Lubok Antu ditu.