Pekit keterubah Kumang Dayak Sarawak

Pekit keterubah Kumang Dayak Sarawak
KUCHING: Pekit Kumang Dayak Sarawak 2009 tu keterubah iya pekit bakanya diatur ba menua tu.Semua indu dara ari semua pupu raban bansa Dayak ulih enggau masuk pekit nya ti mega deka meri prais berega sereta manah.
Pekit nya ti diatur Alaric’s Productions Company nya dibuka ngagai orang mayuh ari raban bansa Dayak tauka siku ari apai indai bansa Dayak. Bala indu dara ke bisi ati enggau masuk pekit nya enda tau enda umur entara 17 ngagai 24 taun lalu peninggi urung 160 sentimeter sereta agi rumpas.
Orang ke ngatur pengawa nya, Alaric Soh madah, Kumang Dayak Sarawak nya kena ngangkatka mayuh macham pengawa dagang temuai ba Kuching enggau Sarawak sereta kena neritka agi kaul entara komuniti Dayak.
“Kelimpah ari nya, pekit nya mega nyendiaka penyurai alai bekenjing ngagai sida ke enggau pekit tu ngemansangka sida iya empu,” ku iya madah ba aum media ditu, kemari.
Iya madah, pekit Kumang Dayak Sarawak ti deka dipejalaika genap taun nya ukai baka pekit ngena gari tradisi tauka asal bansa baka Kumang Gawai tauka pekit bukai tang iya baka pekit ke moden sereta begaya.
“Nyangka orang mayuh ngumbai pekit Kumang Dayak Sarawak tu baka pekit ngena gari tradisi tang iya ukai bansa nya, laban chara sida iya begari, ngena gari ke moden agi lalu utai ke sebaka iya nya pengawa ti dikereja sida sekumbang bepekit nya mayuh pengawa ngayanka adat enggau main asal,” ku Alaric lalu nambah baru, sida ke enggau pekit tu mega nadai dipinta ngena ngepan kena nyemerai.
Alaric madah, pekit nya mega bisi prais ke berega sereta manah magang ke deka diberi ngagai sida ke menang pekit tu ila lalu sida spunsa pan deka nyendiaka gari kena malam pekit nya nyengkaum baju gaun malam.
“Sida ke nadai peneleba ba pengawa ‘modelling’ sereta nganta diri, anang irau laban kami mega bisi nyendia orang ke landik ngias kita sereta ngajar kita ‘catwalk’ maya kita belatih ila,” ku iya.
Alaric Productions Company siti kompeni ke mayuh ngatur mayuh macham pekit baka Miss Cheongsam, Miss Sarawak enggau Miss Tourism Pageant ari taun 1983 suba.
Iya madah, pekit nya bisi lima iti gelar mit kelimpah ari gelar besai Kumang Dayak, iya nya baka Miss Talent, Miss Friendship, Miss Photogenic, Miss Goodwill sereta Miss Beautiful Body lalu sida ke menang tu ila deka mai prais pulai baka mata duit urung RM500 siku ungku genap iti gelar nya.
“Haribulan penudi alai nganjung sereta nerima sida enggau masuk nya 12 November lalu maya milih sida ke enggau pekit tu deka diputarka kena 14 November alai milih 25 iku lalu ari penyampau tu semina 15 iku aja ti deka bepekit ba renggat penudi,” ku iya.
Pekit penudi Kumang Dayak Sarawak deka diatur ba Hotel Riverside Majestic kena 11 Disember 2009 belabuh ari pukul 7 lemai.
Sida ke deka enggau masuk pekit tu enda ibuh ngena pom, laban gambar ‘closeup’, nama sereta lumur talipaun tau dianjung ngagai lumur talipaun binching 014-680 0000 tauka emel ngagai missdayak@gmail. com.
Indu dara ke menang lumur satu deka bulih prais mata duit RM5,000, lumur dua deka bulih (RM2,000), lumur tiga (RM1,000), lumur empat (RM800) lalu lumur lima (RM500).
Sida ke dipilih masuk ngagai renggat penudi tauka final deka nerima mata duit RM200 siku.
Pekit nya dispunsa Hotel Riverside Majestic, media ‘rasmi’ Utusan Borneo, The Borneo Post enggau See Hua Daily News, Lea Centre, Tiger Beer, Lady Jen Group, Inspiration Alan Salon, Hydrotherapy Sdn Bhd, Diamond Press, Les Paul enggau Phil Art Photography.
Sama bisi datai ba aum media nya, bekau Miss Cheongsam 1994 Anna Sze , Miss Cheong sam Charity 2009 Pauline Lau enggau Miss Malaysia/Model 2005 Shirley Su.